مصايب وجنان التؤام فى الغابة السحرية

بقلم الكاتبة المبدعه والمتميزة فاتن فتحى

 تبدأ قصتنا 

في بيت ابطالنا جوري وتالا كانوا قاعدين مع ابوهم ( عبد الرحمن) وبيقولوا 

جوري: بابا احنا كنا عايزين ناخد رأيك في موضوع كده 

تالا: اه بس لو سمحت لو سمحت وافق يا بابا عشان احنا نفسنا نعمل المغامره دي 

عبد الرحمن باستغراب: خير عايزين اي الدخله دي انا مش برتحلها بيكون وراها بلاوي 

اول ما جوري وتالا سمعوا كده ضحكوا 

واتكلمت تالا وقالت 

تالا: بصراحه كده وبراحه انا جايين نقولك اننا رايحين نخيم في الجزيره نعمل سفاري 

جوري: اه واكيد يا بابا يا حبيبي حضرتك مش هتقول لا ليه عشان حضرتك عارف اننا بنحب نخيم وبنعشق المغامرات وبعدين دي مش اول مره نروح 

عبد الرحمن: يعني هتروحوا نفس المكان اللي بتروحوا كل سنه مش هيتغير صح 

جوري: اه طبعاً يا بابا هو احنا نعرف غيره ده مكانا المفضل

تالا: وبعدين حضرتك ميصحش تسألنا سؤال زي ده يا ابتاه المفروض اول ما نقولك تخييم تعرف ان هو نفس المكان اللي كنا بنروحوا مع ماما الله يرحمها 

عبد الرحمن : خلاص كنت بتأكد منكم تمام يا حبايبي روحوا 

اول ما جوري وتالا سمعوا كده راحوا حضنوا ابوهم 

ومشيوا جوري وتالا دخلوا اوضتهم 

جوري: انا كنت خايفه ليقول انه عايز يروح معانا كانت كل مخططنا هتخرب 

تالا: اه وخصوصا لو عرف اننا هنروح جزيره جديده غير اللي بنروحها ده كان هيشحورنا 

جوري اول ما سمعت كده ضحكت وقالت

جوري  : كنا هنتشعلق يا بنتي والله المهم بعد يومين هنروح نخيم بقى ونعمل المغامره الروعه دي جزيره اول مره نروحها ومنعرفش فيها حاجه هنروحها واو انا متحمسه اوي

تالا: طيب يلا ننام احسن يا بتاعة الواو عشان انا مرعوبه اصلا من المغامره دي

جوري بفخر: طول ما انا معاكي اعرفي انك هتتمرطي 

تالا اول ما سمعت كده ضحكت 

وبعد لحظات كانوا تالا وجوري ناموا 

و انتهى اليوم على كده

وبعد مرور يومين من اليوم ده كانوا تالا وجوري راحوا الجزيره واللي كانت جديده بالنسبالهم وكانوا منبهورين بجمالها وبجمال الورود اللي فيها 

اتكلمت جوري بحماس وقالت 

جوري بحماس: لا انا مش مصدقه هي دي الاماكن ولا بلاش بصي يا بت تالا الجمال 

تالا: هي بصراحه حلوه بس انا زعلانه اوي عشان خبينا على بابا الحقيقه 

جوري: يا ستي يعني هو احنا هيحصلنا اي ما هنا زي هناك زي اي جزيره تانيه مش فارقه لكن احنا لازم نغير المكان واهو المكان هادي وجميل مفهوش حد 

في اللحظه دي سمعوا صوت رجلين ماشيه في الجزيره وبتقرب منهم 

اتكلمت تالا بخوف وقالت 

تالا: انتي سامعه اللي انا سمعاه في رجلين ماشيه وبتقرب مننا انا قولتلك بلاش نيجي هنا

جوري بتوتر: احم احم اهدي بس مفيش حاجه لو في حاجه انا هتصرف انا عندي قدره اني اسيطر على الحيوانات 

هزت تالا راسها بالموافقه لكن كانت خايفه اوي 

وصوت الرجلين كان عمال يقرب منهم اكتر واكتر وفجأه الصوت ده بطل وسمعوا صوت شابين بيقولوا بصوت واحد ودول كانوا ابطالنا عمر وسيف 

عمر و سيف بصوت واحد: انتم مين وبتعملوا اي هنا 

اول ما تالا وجوري سمعوا صوتهم خافوا ولفوا وشهم ناحيتهم وهما كانوا مرعوبين 

لكن لما شافوهم انهم شباب عاديه زيهم ارتاحوا شويه وخدوا نفس عميق 

وبصوا جوري وتالا عليهم بغضب شديد واتكلمت جوري بغضب وقالت

جوري بغضب: اي اللي انتم عملتوا ده ممكن اعرف ماشيين ومش عاملين حس وفجأه تتكلموا بصوت واحد عشان نخاف 

عمر بضحك: مش ذنبي انك جبانه وبما انك جبانه كده بتعملي اي في الجزيره 

جوري بغضب: اولا انا مش جبانه اي حد مهما كان قوي وسمع صوت رجلين كده و اتنين بيتكلموا بصوت واحد هيخاف ثانيا انا جايه هنا اخيم 

عمر بضحك: ومن امتى والبنات بتخيم انا اعرف ان البنات اخرها المطبخ مش كده ولا اي 

وضحك عمر من قلبه لما قال كده 

وجوري كانت باصه على عمر بغضب 

اتكلم سيف وقال 

سيف: انا بقول ان انتم تشوفلكم جزيره تانيه خيموا فيها احنا زي الفريك مبنحبش شريك 

تالا: والله احنا ماشيين عايزين تمشوا امشوا انتم سكة السلامه لكن احنا مش شباب زيكم يمشوا كلمتهم علينا تمام 

سيف: لا والله هي بقت كده نمشي احنا طيب احنا بقى مش هنمشي شوفي هتعملي اي 

تالا بضحك: تمشوا تقعدوا مش فارقه معانا انتم اللي شاغلين دماغكم بينا وحارقينكم كده من غير ما نعملكم حاجه متغاظين من وجودنا معاكم عشان عارفين ان لو حصل اي حاجه في الجزيره هنا هنكون احنا الاقوى مش انتم عشان كده مش هيفرق وجودكم او عدمه انتم مش في دماغنا 

اول ما جوري سمعت كده بصت لاختها بفرحه وسقفت وقال

جوري بفرحه: ايوه كده اديلهم اديلهم لازم يعرفوا ان محدش يقدر علينا ابدا 

عمر: فرحانه باختك اوي طيب ياريت بقى يا بتاعه انتي تمشوا من قدامنا وياريت منشفش وشكم تاني 

جوري: وانت مين قالك اننا عايزين نشوف وشكم اصلا المهم احنا مش ماشيين انتم اللي جيتوا خوفتونا يبقى انتم اللي تمشوا 

عمر: وياريت منخيمش جمب بعض ممكن 

جوري: وعد يا استاذ لو حصل النصيب وخيمنا جمب بعض هقولكم تمشوا وتخيموا في حته تانيه 

عمر اول ما سمع كده بص لي جوري بغضب شديد 

وسيف بص لي تالا وقال 

سيف: اعملي حسابك يا ام لسان طويل عايز قص انتي ان احنا مش هنغير المكان اللي هنخيم فيه لو انتم جيتوا جمبنا 

تالا بتنهيده: واحنا مالنا بيكم مش ذنبنا ان لما تشوفوا وشنا بتتعصبوا لكن احنا بنضحك 

جوري بضحك: استاذه في قصف الجبهات يا بت يا تالا 

سيف: اسمك تالا كنت بحب الاسم ده لكن لما عرفتك كرهته 

اول ما عمر سمع كده سقف وبص لي سيف بفرحه وقال 

عمر: ايوه كده اديلهم اديلهم هما فاكرين نفسهم اي 

اما تالا بصت لي سيف بسخريه وقالت 

تالا: وانت مين قالك ان الاسم زاد نفسه عايزاك تحبه 

جوري اول ما سمعت كده ضحكت وبصت لي عمر وسيف وقالت 

جوري بضحك: انا بقول تلموا الباقي من كرامتكم وتتكلوا على الله احنا مش ناقصين وجع دماغ بقى 

عمر: ماشيين بس مش عشان انتي قولتي اننا نمشي احنا ماشيين عشان انتم مش الاستايل المعين اللي احنا نقف معاهم 

جوري بثقه: اه فعلا احنا فوق وانتم تحت عشان كده مينفعش تقفوا معانا الاعتراف بالحق فضيله يا اسمك اي انت 

عمر بغضب: اسمي عمر الغول ولاد صاحب شركات الغول لو تسمعي عنها ولا صح هتسمعي فين اكيد مش بتتابعي اخبار رجال الاعمال واللي جنبي ده اخويا سيف الغول 

جوري بثقه: يا محاسن الصدف انا بقى جوري السويفي بنت صاحب اكبر شركات السيوفي في مصر يا استاذ عمر شفت محدش فينا احسن من حد 

عمر اول ما سمع كده خد نفس عميق وبص لي سيف وعرفوا انهم مهما عملوا مش هيقدروا يغلبوا البنات دي فقرروا الانسحاب 

ولكن قبل ما عمر وسيف يمشوا بصوا على تالا وجوري بغضب جديد 

تالا وجوري بادلوا نظرة الغضب اللي شافوها في عين عمر وسيف بضحكه نرفزت عمر وسيف اكتر 

ومشيوا عمر وسيف 

واول ما مشيوا عمر وسيف جوري بصت لي تالا وقالت 

جوري: بس لا يا بت ابهرتيني اي القصف ده كله ده انا اخد عندك درس 

تالا بثقه: دي اقل حاجه عندي يا بنتي اومال كنت  هيسيبوا يتكلم كده ومردش عليه لا ده عنده يلا بقى نشوف حتى نخيم فيها ونريح شويه وننام 

جوري: ننام اي دلوقتي احنا هنتمشى نستكشف الجزيره شويه وبعد كده هننام وبكره هنكمل استكشاف يلا بس تعالي ورايا انا متحمسه اوي يلا 

ومشيت جوري 

اول ما جوري مشيت اتكلمت تالا وقالت 

تالا: اما نشوف اخرة حماسها ده هيوديها فين انا قلبي بيقولي انه هيودينا في داهيه ان شاء الله 

ومشيت تالا ورا جوري 

وفي مساء اليوم 

كانوا تالا وجوري بيجهزوا المكان اللي هيخيموا  فيه وهما في قمة سعادتهم 

في اللحظه دي ظهر عمر وسيف واول ما شافوهم انصدموا وقالوا بصوت واحد 

عمر وسيف بصوت واحد: انتم بتعملوا اي هنا احنا مش فاكرين احنا اصطبحنا بوش مين عشان نشوف وشكم ده 

اول ما جوري وتالا سمعوا حسهم لفوا وشهم ناحيتهم وضحكوا بسخريه 

وجوري بصت لي عمر وقالت 

جوري: انا اقولك انت اصطبحت بوش مين انت اصطبحت بوشك انت لان الشخص اول ما بيصحى بيبص على نفسه في المرايا 

عمر بغضب: قصدك ان وشي فقر ولا اي 

جوري ببراءه مصطنعه: والله انا مقولتش كده انا اللي قولت كل واحد عارف نفسه كويس 

اتكلم سيف وقال 

سيف: يعني قصدك ان انتي واختك وشكم مش حلو عشان بما ان وشنا فقر شفناكم صح 

تالا: لا احنا وشنا حلو بس على الاشخاص اللي بيدخلوا مزاجنا و وشنا مش حلو على الاشخاص اللي مش بنطيقهم وانتم بقى احنا كده مش طايقنكم 

سيف اول ما سمع كده بص لي تالا بغضب 

اما عمر بص لي جوري وقال

عمر: طيب اي الحل احنا مش لاقيين مكان عدل نخيم فيه غير هنا 

جوري: واحنا بردو مش لاقيين خلاص يا عمر نخيم هنا وخلاص ملهاش حل تاني جهزوا خيمتكم واحنا نجهز خيمتنا تمام 

هزوا عمر وسيف راسهم بالموافقه 

وبالفعل تالا وجوري جهزوا خيمتهم و عمر وسيف جهزوا خيمتهم 

اتكلم عمر وقال 

عمر: ياريت محدش يتدخل في خيمة التاني اه يعني بلاش اسلوب التطفل اللي هو عندكم مخده زياده او غطا زياده تمام 

جوري: ليه هو احنا كنا جيران ولا اي احنا حاجتنا كلها معانا واكلنا معانا كمان بس كنا حطنها في مكان كده عشان مكناش قادرين نلف بالشنط انتم اللي متفكروش تطلبوا مننا اكل تمام 

عمر: اصلا لو بموت من الجوع مش هطلب منك اكل تمام 

جوري: حتى لو طلبت هخليك تموت ومش هديك اصله على قدي ها ها ها ها 

ودخلت جوري الخيمه 

واول ما مشيت جوري اتكلم عمر بسخريه وقال

عمر بسخريه: ها ها ها اي ضحكة الاشرار دي ربنا يهدي 

ودخل عمر الخيمه بتاعته 

اما سيف بص لي تالا وقال 

سيف: طيب انا لو احتجت اكل او حاجه هتديني مش كده يا تالا 

تالا اول ما سمعت ربعت ايدها وبصت الناحيه التانيه وضحكت وقالت بمشاكسه 

تالا بمشاكسه: اديك بمناسبة اي ان شاء الله اديك عشان تأكل اخوك وتفضلوا تغظونا انا واختي مش كده 

سيف بثقه: لا تديني مثلا عشان انتي اعجبتي بيا من اول نظره وبعضلاتي وبعويني الخضره وملامكي الجميله 

اول ما تالا سمعت كده بصت لي سيف من فوق لتحت نظرات كلها قرف وقالت 

تالا: انا مش شيفاك مميز ولا عجبتني بصراحه وبعدين الحب من اول نظره ده في المسلسلات مش هنا يا استاذ واكل مش هديك 

سيف بغضب: هو انتي فاكره نفسك مين ان شاء الله ده انا كلمتك بلطف عشان اخد منك اكل عشان اكلنا خلص وحاولنا نجيب اي حاجه معرفناش ولسه هندور بكره تاني فمتفتكريش نفسك حاجه وتتكبري انتي اللي اصلا تدخلي دماغي 

تالا: خلاص مين قالك اني عاوزه ادخل دماغك انا مش هدخل دماغك انا هدخل الخيمه بتاعتي أكل مع اختي وانام وخليكم انتم واخوكوا جعانين عشان تبقوا الاكل بتاعكم كله يا مفاجيع

ودخلت تالا الخيمه 

اول ما تالا دخلت الخيمه بص سيف على أثرها بغضب ودخل هو كمان الخيمه  

وبعد وقت 

كان عمر واقف بره الخيمه مش عارف ينام من كتر الجوع وكان بيتأمل في السماء 

في اللحظه دي حس بصاعق كهربائي دخل جسمه قعد يهتز جامد من الكهرباء 

وبعد لحظات قصيره الكهرباء خرجت من جسمه لف عمر وشه عشان يشوف مين اللي كهربه انصدم لما شاف جوري ماسكه صاعق كهربائي وبتضحك 

جوري بضحك: شكلك كان يموت ضحك وانت بتترعش من الكهرباء 

عمر بغضب: انتي مجنونه اكيد في حد يعمل اللي انتي عملتيه ده يا بنتي 

جوري بضحك: مش انا عملت يبقى فين انا شوفتك واقف سرحان قولت اقوم اغلس شويه الصاعق ده انا بخليه معايا عشان لو حد بدايقني بقول الصاعق اللا نهائي زي سوبر ميرو كده واكهربوا 

عمر بغضب: حركه بايخه اوي ودمك تقيل اوي ممكن بقى متتكلميش معايا تاني 

جوري بضحك: طيب خلاص هصالحك ثواني ميهنش عليا زعلك 

ومشيت جوري دخلت الخيمه بتاعتها اما عمر كان مستغرب وقال 

عمر باستغراب: يعني هي هتصالحني لما تدخل الخيمه لا بتفهم 

بعد لحظات طلعت جوري وكانت ماسكه في ايدها سندوتش راحت وقفت قدام عمر وادتله السندوتش وقالت 

جوري: يلا خد كل انا مش وحشه عشان اكون عارفه ان حد جعان وانام عادي 

خد عمر منها السندوتش وتبسملها وقال 

عمر بابتسامه: لا طلعك قلبك طيب يا جوري اهو بصراحه انبهرت 

جوري بغضب: ليه ان شاء الله كنت فاكر قلبي مش طيب ولا اي تصور دي غلطتي اني اديتك حاجه اصلا مستفز لولا ان تالا قالتلي ان انتم مفاجيع وخلصتوا الاكل بتاعكم في السكه مكنتش عبرتكم 

عمر: والله انتي غريبه مكنش باين عليكي انك حنينه بصراحه وبعدين اهو بقولك قلبك طيب اعمل اي عشان ترضي 

جوري: متعملش حاجه كل وانت ساكت يلا باي 

ودخلت جوري الخيمه بتاعتها 

اما عمر بص على اثرها باستغراب هو مش عارف اذا كانت طيبه ولا مجنونه ولا اي حكايتها بالظبط 

وكل عمر السندوتش ودخل الخيمه بتاعته 

بعد لحظات 

كان سيف واقف حاطط ايده على بطنه وكان بيقول 

سيف: لا انا جعان فعلا الله يخربيتك يا عمر خلتنا ناكل الاكل كل قعدت تقول كل كل هنلاقي اكل في الجزيره ولا لقينا ولا عملنا واديني اهو عمال انام واقوم 

في اللحظه دي خرجت تالا وشافت سيف وهو بيكلم نفسه ضحكت ضحكه خفيفه عشان سيف ميسمعهاش ونعكشت شعرها ومشيت على اطراف صوابعها و وقفت ورا سيف وعملت حركة العفاريت وقالت بصوت رجولي مخيف 

تالا بصوت رجولي مخيف: انت واقف وحدك بتكلم نفسك انت اتجننت ولا اي انت مش عارف ان اللي بيقف هنا في نص الليل ويكلم نفسه انا باجي واخلص عليه 

سيف كان سامع الكلام ده وكان مصدوم ومتردد مش عارف يلف وشه ولا لا لكن تمالك نفسه ولف وشه وانصدم لما شاف تالا هي شعرها منكوش وبتضحك وهي بتشاور عليه بصباعها 

تالا بضحك: يالهوي على شكل وشك جاب الوان قوس قزح كلها 

سيف بغضب: على فكره بقى ده مش هزار يا تالا خالص انتي وقعتي قلبي في رجلي وبعدين ياريت تعدلي شكل شعرك ده شكله مرعب اكتر من الصوت اصلا 

هزت تالا راسها بالموافقه وعدلت شعرها ورجعته طبيعي وبصت لي سيف وقالت 

تالا: نفسي اعرف ازاي القلب يقع في الرجلين مش القلب تبع الاوعيه الدمويه والرجلين تبع العظام ازاي بقى القلب يقع في الرجل ممكن اعرف 

سيف: اكيد مش بيقع حاجه كده احنا بنقولها مجازا يا تالا 

تالا: اممم مجاز غريب صراحه المهم انت زعلت من الحركه دي ولا لا ردك ده هيحدد حاجه مهمه اوي بالنسبالك 

سيف باستغراب: هيحدد اي ردي وعلى العموم انا فعلا زعلت طبعا شايفاني مبحسش انا جعان وبطني وجعاني وانتي جايه تزودي الطين بله ده ينفع وكمان هو انتي 

في اللحظه دي تالا قاطعته وقالت 

تالا بغضب: خلاص وطي حسك شويه اختي واخوك نايمين انا مش عارفه انا اي اللي صحاني اصلا حظك بقى المهم ياريت تكتم لحد ما اخش اجبلك حاجه واطلع تمام سكوت 

هز سيف راسه بالموافقه 

ودخلت تالا الخيمه بتاعتها 

وبعد لحظات طلعت تالا وهي معاها سندوتش راحت لي سيف وادتله السندوتش وقالت 

تالا: خد اطفح قصدي كل قلبي الطيب مهنش عليه انه يخليك نايم جعان 

سيف بمشاكسه: قلبك الطيب بردو ولا جاذبيتي هي اللي اثرت عليكي 

تالا بغضب: والله هاخد منك السندوتش انت متستاهلوش اصلا 

سيف بضحك: خلاص يا ستي متقفشيش قولت اهزر معاكي شكرا على السندوتش 

تالا: لا عادي يلا الف هنا وشفا تصبح على خير 

ومشيت تالا ودخلت الخيمه 

اما سيف بص على أثر تالا بابتسامه وكل السندوتش ودخل الخيمه بتاعته 

و انتهى اليوم على كده 

في صباح يوم جديد كانوا ابطالنا الاربعه صحيوا واتفقوا هما انهم يتمشوا مع بعض لكن طبعا بعد ما اتخانقوا واتجادلوا كتير 

وبعد لحظات وهما ماشيين اتكلمت جوري بملل وقالت 

جوري بملل: لا انا حاسه اني زهقت انا عاوزه اروح مفيش اي حيوانات مفترسه اي مغامره اي حاجه 

تالا: كده احسن بكتير الاجواء هاديه وجميله انا بحب الاجواء دي 

سيف بسخريه: ازاي واحده عاصفه زيك كده تحب الاجواء الهاديه لا غريبه 

تالا: دمك يلطش يا سيف لو انا عاصفه تبقى انت البرق و الرعد 

كان لسه سيف هيرد على تالا لكن قاطعه عمر بصوت عالي لما قال

عمر بصوت عالي: ما خلاص انتم الاتنين اي اطفال ده لو ممشي معايا ولاد اختي مش هيكونوا كده 

جوري بسخريه: اتكلم عن نفسك يا عمر احسن ده انت اصغر منهم ده تلاقي العيال الصغيره عندهم عقل عنك 

عمر: مش هرد عليكي احسن عشان انا مش ناقص صداع 

بصت جوري لي عمر وضحكت 

وبعد لحظات وصلوا هما الاربعه قدام كوخ شكله غريب الحجر بتاعه اسود ومش نظيف

اتكلمت جوري وقالت

جوري: الكوخ ده انا حاسه ان في حاجه مش طبيعيه مش نظيف كده انا عاوزه ادخله 

تالا: مش هيحصل مش هنخش الكوخ ده احنا ابدا الله اعلم في اي جوه 

جوري: ايوه هو اي اللي جوه بقى انا عاوزه اعرف تحسيه ده كده رعب انا هخش 

وكانت جوري لسه هتمشي لكن عمر مسك ايدها وقال

عمر: لا يا جوري بلاش ممكن يكون في تعبان جوه ولا حاجه او اي حيوان مفترس يأذيكي ويأذينا 

جوري بصت لي عمر بغضب وشالت ايده وقالت 

جوري: انا اصلا جايه هنا اغامر مش عشان نقعد نتمشى ونتخانق وخلاص 

تالا: بس احنا منعرفش في اي جوه عشان كده بلاش مخاطره انتي مش بتعرفي تسيطري على كل الحيوانات بردو 

سيف: لاول مره تالا تقول حاجه صح من ساعة ما عرفتها بلاش مخاطره 

جوري بغضب: خلاص يلا نمشي مش داخله محدش فيكم عنده فضول يعرف اي اللي جوه الكوخ ده 

سيف وعمر وتالا بصوت واحد: لا محدش فينا عايز يعرف ويلا بقى تعالى ورانا 

هزت جوري راسها بالموافقه 

ومشيوا سيف وعمر وتالا 

اما جوري كانت لسه هتمشي وراهم لكن فضولها سيطر عليها تعرف اي اللي جوه الكوخ وقالت 

جوري: لا ما انا فضولي هيموتني لازم اعرف الكوخ الغريب ده في ايه 

ومشيت جوري ناحية الكوخ 

عند تالا وسيف وعمر 

تالا: اكيد يا جوري انتي مقموصه عشان مدخلتيش الكوخ بس معلش بقى كلامنا هو اللي مشي ما تردي يا جوري 

في اللحظه دي عمر بص وراه شاف جوري وهي داخله الكوخ انصدم وقال 

عمر: الحقوا جوري هتدخل الكوخ هتعملها بردو 

اول ما سيف وتالا سمعوا كده انصدموا 

ومشيوا سيف وتالا وعمر جري عشان يلحقوا جوري 

لكن جوري كانت دخلت الكوخ وفي نفس اللحظه اللي دخلت فيها جوري الكوخ دخلوا سيف وتالا وعمر الكوخ وهما كانوا بينهجوا من الجري 

وانصدموا لما شافوا ست كبيره لابسه عبايه سودا ملامحها مخيفه عينيها لونها اخضر مخيف وكانت بتبتسم ابتسامه شريره ودي كانت ( ماليفيرا) الساحره الشريره 

اتكلمت جوري بخوف وقالت 

جوري بخوف: انتي مين وبتعملي اي هنا وازاي قاعده في المكان المعفن ده 

ماليفيرا: انا ماليفيرا ملكة الجزيره دي انا كنت ناويه اسبكم تنبسطوا في الجزيره لكن بما انكم كشفتوا سري وعرفتوا اسمي يبقى خلاص مينفعش تعيشوا تاني 

اول ما ابطالنا الاربعه سمعوا كده انصدموا واتوتروا من كلامها ده 

اتكلمت تالا وقالت 

تالا: اي ملكة جزيره ايه واي الاسم الغريب ده مافيرا ايه 

سيف: مش وقته استغراب انتي عارفه ده وقت ايه ده وقت الجري بس انا رجلي وقفت حد يجري ويشدني معاه 

عمر: بس بقى نفهم الاول مين دي نتصرف بعقلانيه شويه 

في اللحظه دي جوري اتكلمت وقالت 

جوري: بطلوا انتم التلاته هبل بقى دي ماليفرا الساحره وملكة الجزيره وممكن تخلص علينا دلوقتي لو مقعدتوش ساكتين 

ماليفيرا: لا يا بت يا جوري شاطره انك عرفتي انتي مين 

جوري بخوف: انتي عرفتي اسمي طيب ازاي بقى 

ماليفيرا: مش ساحره يعني اعرفك انتي وعمر وتالا وسيف 

اول  ما ابطالنا الاربعه سمعوا كده انصدموا وكانوا واقفين وهما بيترعشوا من كتر الخوف

لكن جوري تمالكت  اعصابها وقالت 

جوري: طيب اكيد في حل عشان منمتش مش كده بصي لو عاوزانا منقولش حاجه عنك مش هنقول ولا كأننا شفناكي بس متأذيناش اعتبرينا عيالك 

ماليفيرا: معنديش عيال انا ومش بحب اعتبر حد زي عيالي بصراحه 

تالا : لو سمحت متقتلناش احنا لسه عايزين نعيش حياتنا 

عمر بغضب: انتم الاتنين بتتحايلوا عليها ليه احنا نسبها ونمشي هي هتعمل اي يعني دي شكلها بق على الفاضي 

وبص عمر لي جوري وقال

عمر: اصلا كله بسببك انتي انا قولتلك مندخلش دخلتينا و وهمتيها انها ساحره ومش ساحره 

جوري بغضب: لا انا موهمتش حاجه انت مخدتش بالك من الصولجان اللي جنبها ولا اي 

اول ما ماليفيرا سمعت كده مسكت الصولجان و وجهته ناحية عمر وغمضت عينها 

في اللحظه دي اتحول عمر لغوريلا ضخمه 

اول ما جوري وسيف وتالا شافوا كده انصدموا وحطوا ايدهم على بقهم من الخوف 

ماليفيرا بشر: اهو يا عمر بقيت غوريلا عشان تبقى تقلل مني 

عمر: انتي عملتي فيا اي غوريلا اي رجعيني زي ما كنت بقولك يا ماليفيرا 

ماليفيرا: انت بتأمرني ولا اي كلمني بأدب الاول وابقى افكر ارجعك ولا لا 

اول ما جوري سمعت كده بصت لي عمر بحزن شديد مكنتش مصدقه ان عمر بقى غوريلا فعلا ولامت نفسها وقالت في نفسها 

جوري في نفسها: اي الحل دلوقتي عمر بقة غوريلا وسيف وتالا مرعوبين وانا السبب ياريتني كنت سمعت كلامهم ومدخلتش هنا بس لازم اتصرف 

وراحت و وقفت قدام ماليفيرا واترجتها وقالت

جوري: ست ماليفيرا لو سمحت رجعيه زي نا كان وهو مش هيغلط تاني 

وبصت جوري لي عمر ( الغوريلا) وقالت 

جوري: عمر قول اعتذر عشان ترجع ومش وقت عجرفه 

عمر: انا اسف يا ماليفيرا لو سمحت رجعيني انا حاسس ان جسمي تقيل ومش عارف اتحرك عدل رجعيني بقى 

سيف: رجعي عمر لو سمحت واحنا اسفين محدش هيغلط فيكي تاني

تالا: لو سمحت هو مالوش ذنب هو اتعصب شويه وخلاص رجعيه بقى 

ماليفيرا: خلاص مستعده ارجعوا بس بشرط واحد لو وافقتوا عليه عمر هيرجع اما لو موافقتوش عمر مش هيرجع وانتم هتموتوا كلكم 

جوري باستغراب: اي هو الشرط ده يا ماليفيرا 

ماليفيرا: تنزلوا في اعماق البحار تجبولي اللؤلؤه وانا بعد ما اخد اللؤلؤه امشيكم من هنا 

تالا: طيب معلش احنا ايش ضمنا اننا لما نجبلك اللؤلؤه هتسبينا تمشي 

ماليفيرا: انا مش محتاجه اديكم ضمانات انتم اللي محتاجين تسمعوا كلامي دلوقتي عشان عمر يرجع طبيعي بدل ما هو غوريلا كده ومحتاجين انكم تعيشوا 

بصت جوري لي سيف وتالا وغمزتلهم وبعد كده بصت لي ماليفيرا وقالت 

جوري: خلاص تمام ننزل نجبلك اللؤلؤه من اعماق البحار بس رجعي عمر تاني 

اول ما ماليفيرا سمعت كده ضحكت بشر ومسكت الصولجان و وجهته ناحية عمر وبصتله وغمضت عينها 

في اللحظه دي رجع عمر طبيعي تاني 

اول ما سيف شاف عمر رجع تاني راح جري عليه وحضنه 

وجوري وتالا خدوا نفس عميق 

اما عمر اتكلم وقال 

عمر: لؤلؤه اي دي اللي عايزانا نجبها واعماق بحار انا مبعرفش اعوم 

ماليفيرا: لا كلكم هتغوصوا تحت الماء وهتجبولي اللؤلؤه والا هخلص عليكم 

بصت جوري لي عمر نظره هو فهم معناها 

وبعد كده بصت لي ماليفيرا وقالت 

جوري: خلاص بكره هنروح وننزل البحر ونجبلك اللؤلؤه نديكي اللؤلؤه تخرجينا من هنا لكن متفكريش تخمي 

ماليفيرا: مش بكره بليل الصبح ممكن تلاقوا صيادين على البحر هيعطلوا المهمه بليل 

جوري: حاضر حاضر بليل هنروح احنا بقى نرتاح شويه عشان هنغوص بليل 

هزت ماليفيرا راسها بالموافقه 

ومشيوا ابطالنا الاربعه من الكوخ 

اول ما مشيوا من الكوخ جوري اتكلمت وقالت 

جوري: انا عملت كده عشان نمشي من عندها وهي طلعت هبله وصدقت اننا فعلا هننزل ونجبلها اللؤلؤه ساحره على قدها 

عمر: اه وانا اللي افتكرت انك فعلا هتنزلي في اعماق البحار تجيبي اللؤلؤه 

تالا: دلوقتي احنا لازم نمشي من هنا الست دي مش سهله وممكن على بليل تدور علينا لازم نمشي دلوقتي 

سيف: يلا نمشي فعلا دي مطلعتش جزيره عاديه دي طلعت سحريه 

وكانوا لسه ابطالنا الاربعه هيمشوا 

لكن وقفوا لما شافوا الجزيره بقت ضلمه والورد والشجر اختفوا وسمعوا صوت مخيف وبعد كده شافوا طوب بينزل من فوق 

بعدوا عن الطوب وكانوا مستغربين من التغيير المفاجئ ده 

في اللحظه دي ظهرت ماليفيرا وهي على ظهر التنين 

والتنين كان بيطلع من بقه نار 

بصت ماليفيرا عليهم بغضب وقالت 

ماليفيرا بغضب: بقى انتم فاكرين انكم هتضحكوا عليا ولا اي اول ما جوري بصت لي سيف وتالا وغمزت عرفت اقرأ افكارها ده انتم مستهونين بيا وفاكرني ساحره مش قد كده صح وكمان عايزين تهربوا انتم اللي دخلتوا مكاني السري يبقى استحملوا اللي هيحصلكم قي الجزيره السحريه 

جوري بخوف: انا اسفه اني دخلت والله انا مكنش قصدي سبينا نمشي احنا اتفه مما تتخيلي انتي عارفه احنا هنطلع من هنا هننسى كل حاجه اه والله 

وبصت جوري لي سيف وتالا وعمر وقالت 

جوري: مش احنا هننسى كل حاجه مش كده يا شباب 

سيف وتالا وعمر بصوت واحد: اه والله هننسى كل حاجه 

ماليفيرا: انتم تدخلوا بمزاجكم اه لكن خروجكم بمزاجي انا وبعدين انتم اللي دخلتوا الكوخ يعني جيتوا لحد عندي برجليكم انا كنت ناويه اسيبكم تتهنوا بس حظكم ونصيبكم بقى وانا بما اني قولت انتم اللي هتجيبوا اللؤلؤه يبقى انتم اللي هتجيبوا اللؤلؤه يعني انتم اللي هتجيبوا اللؤلؤه وانا كلمتي متنزلش الارض ابدا 

جوري وعمر وسيف وتالا بصوت واحد: حنفي 

ماليفيرا باستغراب: هي اي حنفي دي مش فاهمه 

سيف: يعني المفروض لما نقولك حنفي تقولي خلاص هتنزل المرادي احنا متأثرين بالافلام القديمه اوي

ماليفيرا بغضب: لا يا ظريف منك ليها كلمتي مش هتنزل واعملوا حسابكم على بليل هتجبولي اللؤلؤه اخر كلام فاهمين 

هزوا ابطالنا الاربعه راسهم بالموافقه 

ومشيت ماليفيرا وهي على ظهر التنين 

اول ما ماليفيرا مشيت بصت تالا لي جوري بغضب وقالت 

تالا: اي الحل بقى احنا في ورطه الجزيره الجميله قلبت شكلها بقى رعب وكل اللي حصل ده بسببك انتي اللي اصريتي تجبينا هنا وانتي اللي اصريتي تدخلي الزفت الكوخ ده 

سيف: زي ما عكتيها صلحيها احنا في ورطه بسببك 

جوري كانت بتبص عليهم بحزن شديد ومكنتش عارفه ترد عليهم 

اما عمر راح وقف جمب جوري ومسك ايدها وقال 

عمر: براحه عليها هي كانت تعرف ان هيحصل ده كله اكيد لا 

جوري بصت لي عمر وقالت 

جوري: بجد شكرا ليك يا عمر يعني اكيد مكنتش عارفه انك هتتحول تبقى غوريلا 

عمر بتوتر: انتي عاوزه تشكريني بجد ممكن اطلب منك حاجه وتجبهالي

جوري وسيف وتالا اول ما سمعوا كده بصوا لي عمر باستغراب 

وعمر اتكلم بحرج شديد وقال

عمر بحرج: انا جعان اوي ومش عايز أكل اي حاجه غير الموز نفسي في موز اوي اتصرفوا انا عاوز موز 

جوري وتالا وسيف بصوت واحد: ايه موز اهو ده اللي كنا خايفين منهم 

وعمر بص عليهم وحط ايده على بطنه وقال

عمر: انا عاوز موز نفسي فيه قدروا ان الغوريلا مش بتاكل غير موز يا جماعه 

جوري: ماشي يلا بينا نشوف اي شجره عليها موز عشان الاستاذ ياكل موز 

ومشيوا ابطالنا الاربعه 

وبعد وقت 

كان عمر قاعد فوق الشجره بياكل موز بطريقه مضحكه زي القرود والغوريلا فعلا 

اتكلمت جوري وقالت 

جوري: انا مش مصدقه ان المكان ده خارج السحر ده المكان الوحيد اللي متحولش لظلام انا بقول اننها نحاول نلاقي طريقه نخرج بيها من الجزيره دي من هنا 

سيف: المكان ده مش خارج السحر ولا حاجه المكان ده اللي يوصلك لبحر لو كان ده اتحاط بالسحر كان ممكن البحر يختفي وهي مش عاوزه البحر يختفي عشان عاوزانا ننزل اعماق البحار عشان نجيب اللؤلؤه 

بصت تالا لي سيف بفرحه وسقفت وقالت 

تالا بفرحه: لا شاطر يا سيف فعلا عرفت اللي فيها 

سيف بثقه: اه يا بنتي انا عارف كل حاجه عشان تعرفي بس 

تبسمت تالا لي سيف 

جوري بغضب: والله ده ما وقت مشاعر حب خالص انا عاوزه اهرب اكيد في مكان يطلعنا من المكان ده 

وبصت جوري على عمر اللي كان فوق الشجره وقالت 

جوري: عمر يا عمر اخلص وانزل يلا كفايه كده يلا عشان نشوف حل عشان نهرب من المكان ده 

هز عمر راسه بالموافقه 

ونط عمر من فوق الشجر ونزل وقف قدامهم وقال

عمر: هنهرب ازاي يعني ما احنا اكيد متراقيين دي ساحره عارفين يعني اي ساحره 

جوري: نتفائل خير ممكن نلاقي يلا عشان نلاقي اي مخرج

وكانوا لسه هيمشوا لكن شافوا التنين لكن كان لوحده وكان عمال يطلع نار جامده من بقه وعمال يقرب منه 

اول ما هما شافوا كده خافوا وقعدوا يجروا والتنين عمال يجري وراهم وبيطلع نار من بقه 

وهما بيجروا انصدموا لما شافوا ماليفيرا قاعده على عصايه وطايره في السما 

بصت ماليفيرا عليهم بغضب وقالت 

ماليفيرا بغضب: متفكروش تهربوا او تجيبوا سيرة الهروب عشان انا بتعصب اوي لما بسمع كده وانتم اكيد مش هيهون عليكم اني اتعصب مش كده 

هزوا ابطالنا الاربعه راسهم بالموافقه 

ماليفيرا: شاطرين ولازم تعرفوا حاجه انا مرقباكم من كورتي السحريه يعني متفكروش تشغلوا دماغكم عليا كلها ساعات وتنزلوا تجيبوا اللؤلؤه ماشي 

هزوا ابطالنا الاربعه راسهم بالموافقه 

وماليفيرا بصت عليهم بغضب ومشيت 

اول ما ماليفيرا مشيت اتكلمت جوري وقالت 

جوري: بقولكم اي احنا خلاص مش هينفع نهرب احنا ننزل بليل نجيب اللؤلؤه ندهلها ونمشي من هنا مش ناقصين احنا تنين يجري ورانا ولا حد يتحول تاني ماشي 

هزوا سيف وتالا وعمر راسهم بالموافقه 

وفي مساء اليوم 

كانوا ابطالنا الاربعه واقفين قدام البحر 

اتكلمت جوري وقالت

جوري: في مشكله كبيره احنا معناش ملابس غطس هننزل ازاي 

سيف: وانتي عملتي فيها ذكيه وفضلتي تتفاوضي معاها ومهنش عليكي تسأليها هنجيب ملابس الغطس منين

بص عمر لي سيف وقال 

عمر: اتكلم معاها براحه هي دماغها كانت في اي ولا اي ما هي زينا اكيد مش قصدها تأذينا ولا تحولني غوريلا ولا قصدها كل اللي احنا فيه 

بصت جوري لي عمر بحب وقالت

جوري: شكرا يا عمر انت الوحيد اللي حاسس بيا والله انا متدايقه اننا دخلنا في المتاهه دي واني انا السبب 

كان لسه عمر هيتكلم لكن قاطعته تالا لما قالت

تالا بغضب : مش وقت رومانسيه هو هنجيب لبس غطس منييييييين 

جوري بفرحه: يبقى مش هننزل عشان لو نزلنا كده  هنموت في الحالتين مش هنديها اللؤلؤه احنا نقولها معناش لبس غطس وانها تخرجنا ونحلفلها اننا مش هنقول حاجه او تسحرنا تخلينا ننساها 

في اللحظه دي ظهرت ماليفيرا وهي على ظهر التنين وبصتلهم وقالت 

ماليفيرا: اغبيه كلكم اغبيه اكيد مش هيتوه عني حاجه زي كده بس كنت مستنيه حد يفتكر اني ممكن انا اجبلكم لبس الغطس وفعلا ممكن اخليكم تنسوا بس انا عاوزه اللؤلؤه

ومسكت ماليفيرا الصولجان و وجهته ناحيتهم وغمضت عينها 

في اللحظه دي ابطالنا لبسهم اتغير وبقوا لابسين لبس الغطس 

اول ما ابطالنا الاربعه شافوا ان لبسهم اتغير انصدموا وكان بيبصوا على نفسهم باستغراب 

اتكلمت جوري وقالت

جوري: طيب تمام حلو اوي نفترض ان واحنا رايحين نجيب اللؤلؤه شفنا حوت هجم علينا ولا حاجه 

عمر: اه لازم تدينا حاجه نحمي نفسنا مش عشانا ده عشانك والله 

ماليفيرا اول ما سمعت كده نزلت وراحت وقفت قدام جوري وادت لجوري سكينه وقالت 

ماليفيرا: انا اخترتك انتي عشان باين عليكي ذكيه بس لو شفتي الحوت لازم ترمي السكينه عليه وتيجي فيه فعلا عشان لو جت في البحر انتم هتموتوا وتضحيتكم انكم تجيبولي اللؤلؤه هتروح على الفاضي ونبقى احنا الاتنين خسرانين انتم حياتكم وانا اللؤلؤه هتعرفي يا حلوه 

جوري كانت سامعه الكلام ده كله وكانت مصدومه وخايفه لكن تمالكت نفسها وبصت في عيون ماليفيرا وهزت راسها بالموافقه 

تبسمت ماليفيرا بشر ليهم وسابتهم وراحت ركبت على ضهر التنين 

 ومشيت ماليفيرا 

وبعد وقت 

كانوا ابطالنا الاربعه في اعماق البحار بيدورا على اللؤلؤه بحذر 

وبعد لحظات شافوا اللؤلؤه فرحوا جدا وكانوا لسه هيروحوا يجبوها 

في اللحظه دي ظهر حوت كبير وبعدوا ابطالنا الاربعه عن الحوت واللولؤه 

وجوري اتذكرت ان معاها سكينه عشان ترميها على الحوت قالت جوري في نفسها

جوري في نفسها: اعمل اي انا بقى لازم اخلص من الحوت عشان اجيب اللؤلؤه وانقذهم من اللي انا دخلتهم فيه ده يارب قويني 

طلعت جوري السكينه و وجتها ناحية الحوت اللي كان عمال يبص عليهم بصات مرعبه 

تمالكت جوري اعصابها وركزت على الحوت ورمت السكينه عليه 

وجت السكينه في نص راس الحوت واختفى الحوت

اول ما ابطالنا شافوا كده بصوا لبعض بفرحه وراحوا وخدوا اللؤلؤه 

بعد لحظات كانوا طلعوا من البحر وجوري كانت ماسكه اللؤلؤه وتالا وسيف و عمر كانوا بينططوا من الفرحه 

تالا بفرحه: انا مش مصدقه ان احنا جبنا اللؤلؤه وخلاص هنديها لي ماليفيرا ونطلع ونرجع لحياتنا تاني 

عمر: اه بس متنكروش انها مغامره حلوه بس عارفين اي المشكله اني لسه نفسي أكل موز 

سيف و تالا  اول ما سمعوا كده ضحكوا لكن جوري كانت سرحانه 

سيف بضحك : ده انت خلتني اكره الموز يا اخي المهم هي ماليفيرا هتيجي امتى عايزين نخلص بقى 

بص عمر لي جوري وقال

عمر: مالك يا جوري ساكته ليه انتي فرحانه باللؤلؤه لكن مش فرحانه اننا هنديها لي ماليفيرا وهنطلع بره الجزيره ليه 

جوري بحزن: ماليفيرا دي ساحره شريره واللؤلؤه دي بتملع اوي يعني ساحره و ممكن تستخدمها في الشر وساعتها هنكون ساهمنا في شر ممكن يتسبب للعالم اصل يا ترى هيكون اي اصرارها على اننا نجيب اللؤلؤه دي انا هتجنن ياريتنا كنا متنا احسن ما كنا نجيب اللؤلؤه دي لكن احنا فكرنا بنفسنا الاول

تالا: كلامك صح بس هنعمل اي لازم نديها اللؤلؤه احنا كنا انانين ومجاش في بالنا كده خالص 

سيف: جوري انا فاهم كلامك بس احنا مفيش حاجه بايدينا غير اننا ندهلها ونقول ربنا يستر انا بردو خايف على عيلتنا وعلى صحابنا وشغلنا وحياتنا بس اي الحل 

عمر: هو احنا مينفعش مندهاش اللؤلؤه ونقولها فشلنا ونكسر اللؤلؤه دي 

جوري: فكره حلوه  بس احنا منعرفش قوة اللؤلؤه دي اي لو اتكسرت الموضوع خطير 

في اللحظه دي الدنيا ضلمت والطوب رجع ينزل من فوق وهما حاولوا يتجنبوا الطوب ده

وظهرت ماليفيرا من غير التنين  وكانت ماسكه اللؤلؤه 

جوري اول ما شافت اللؤلؤه معاها انصدمت وقالت 

جوري بصدمه: اللؤلؤه ازاي خدتيها دي كانت معايا 

ماليفيرا بضحكه شريره: ها ها ها ها مشكلتك انك ذكيه يا جوري وغبيه في نفس الوقت لكن صح انا هستخدم اللؤلؤه في الشر فعلا بس انتي لازم تتعاقبي على تفكيرك الصح 

جوري بتوتر: اتعاقب على تفكيري الصح ليه هو مش اصول اتعاقب على تفكيري الغلط ولا هي بالعكس معاكي يا ماليفيرا 

ماليفيرا اول ما سمعت كده مسكت الصولجان بتاعتها و وجهته ناحية جوري وغمضت عينها 

في اللحظه دي اتحولت جوري لي نمر 

تالا وسيف وعمر اول ما شافوا كده حطوا ايدهم على بقهم من الخوف 

تالا بصدمه: نمر اختي بقت نمر ازاي ده يالهوي 

جوري: انا بقيت نمر معقول طيب يعني هرجع ولا هفضل كده

بصت تالا لي ماليفيرا وقالت 

تالا: رجعيها لو سمحت يا ماليفيرا واحنا مش هنتدخل في حاجه بس ترجع والا انا مش هسكتلك 

ماليفيرا: هتعمليلي اي يعني متقدريش تعمليلي حاجه وبعدين انتي عارفه يا تالا انا اكتر جمله بكرهها جملة انا مش هسكتلك عشان كده استقبلي 

ماليفيرا مسكت الصولجان بتاعتها و وجهته ناحية تالا وغمضت عينها 

في اللحظه دي اتحولت تالا لي بطه 

سيف اول ما شاف تالا كده انصدم وقال 

سيف: بطه حلو اهو البطه احسن من نمر 

عمر بص لي جوري ( النمر) وقال

عمر: اه بس النمر الاقوى من البطه بكتير يبقى النمر احسن 

سيف: ده بالنسبالك مش بالنسبالي على فكره انا بحب البط 

كان لسه عمر هيتكلم لكن قاطعته ماليفيرا لما قالت

ماليفيرا: شاطرين اتأقلموا مع شكلهم الجديد بقى عشان هما يقعدوا كده يومين 

عمر بصدمه: يومين طيب وبعد اليومين اي اللي هيحصل 

ماليفيرا بخبث: لو كملتوا اليومين ابقوا اتكلموا ها ها ها 

في اللحظه دي سيف فهم قصدها اي وبص عليها بغضب وقال 

سيف بغضب: انا فهمت قصدك لا متعمليش كده مش هنقدر نموت كده

وكان لسه سيف هيروح ناحيتها 

لكن ماليفيرا وجهت الصولجان بتاعها عليه 

وفي اللحظه دي اتربط سيف بالحبال

وعمر اول ما شاف كده انصدم ومقدرش يتكلم كلمه واحده 

لكن ماليفيرا بصت عليهم بغضب وقالت 

ماليفيرا: معلش نسيت اقول اني مبحبش حد يبصلي بغضب 

سيف بحزن: هو انتي مش بتحبي اي حاجه اومال بتحبي اي فكيني لو سمحت 

ماليفيرا: انا بحب الشر مش بحب غيره وانت هتتفك بعد ربع ساعه عشان النمور مش بيحبه طعم الحبل وصح تالا هترجع بعد ربع ساعه بردو عشان انا بحب جوري اوي ومش عاوزه اتعبها وهي ولا اقول هتعرفوا لوحدكم 

وبصتلهم ماليفيرا وهي بتضحك ضحكه خبيثه ومشيت 

اول ما ماليفيرا مشت جوري ( النمر) قالت

جوري: لا انا مش فاهمه اشمعنا سيف وتالا هيرجعوا لطبيعتهم بعد ربع ساعه وانا لا 

عمر في اللحظه قعد على الارض وحط ايده على راس النمر وقال

عمر بحزن : عشان تجوعي وتاكلينا احنا التلاته وبعد كده ممكن تموتي مقهوره او تعيشي بس مش هتلاقي تاكلي ولو فضلتي عايشه لحد ما ترجعي لطبيعتك مش هتعرفي تعيشي من غيرنا يعني في كل الحالات ميته انا مكنتش مستوعب لكن نظرات سيف ولما قال مش هنقدر نموت كده فهمت 

جوري بتوتر: انا هحاول اسيطر على جوعي حتى لو هموت لكن مش هخلص عليكم

سيف: صعب عشان مش هتقدري تسيطري على جوعك والنمر أكله لحوم فقط 

عمر بص لي جوري بحب وقال

عمر بحب: حتى لو هموت على ايدك مستعد انتي متعرفيش انتي بقيتي قريبه مني ازاي و با با با

جوري: با با با اي لا متقولش حاجه دلوقتي لو سمحت مش وقته يعني مش وقت تيجي تعترفلي وانا نمر 

عمر: يعني انتي عارفه بمشاعري بس لازم تعرفي انك حتى لو نمر عجباني 

كانت لسه جوري هتتكلم لكن قاطعها سيف لما قال

سيف: مش وقته هو ركز في الموز يا عمر احسن

عمر: طيب والله نفسي فيه بس بحاول اقاوم 

اتكلمت جوري وقالت 

جوري: هي تالا مش بتتكلم ليه اشمعنا هي ما انا وعمر اتحولنا وبنتكلم لا بتفضلنا عليها حرام دي اختي بردو ممكن تغير كده ونخسر بعض 

سيف وعمر بصوت واحد: هو ده وقت غيره جوري اقعدي ساكته 

وفي مساء اليوم الجديد

كانت تالا رجعت على طبيعتها وسيف الحبل بتاعه اتفك وعمر كان بيتكلم مع جوري 

اما جوري كانت ابتدت تحس بالجوع وكانت بتحاول تسيطر على نفسها 

جوري: انا مش قادره خالص انا جعانه اوي اوي مش قادره اسيطر عليه اكتر من كده 

تالا: طيب اي الحل يعني يا جوري اكيد مش هتاكلينا 

جوري: انا مش شيفاكم اصلا  انا شيفاكم دلوقتي كلكم لحوم هتشبعني وخلاص اعمل اي جعانه 

اول ما سيف وتالا وعمر سمعوا كده خافوا 

ونظرة النمر قلبت خالص وكان عايز يهجم على اي حد 

جوري: مفيش غيركم قدامي سامحوني بقى انا مش قادره اسيطر على جوعي اكتر من كده 

عمر بتوتر: جوري حبيبتي اهدي هنهون عليكي يعني 

جوري: انت مش قولت مستعد اني اكلك نفذ كلامك بقى 

عمر بخوف: بس بس لا سامحيني يا جوري مش هقدر 

وبص النمر على سيف وتالا نظره مرعبه 

في اللحظه دي سيف وتالا وعمر جريوا جامد والنمر قعد يجري وراهم 

وبعد وقت من الجري المستمر 

سيف وتالا وعمر وهما بيجروا شافوا اسد عايز يهجم عليهم 

في اللحظه دي جه النمر وشاف الاسد 

جوري: خلاص يا جماعه انا هاكل الاسد ده وسعوا كده 

وقرب النمر من الاسد وابتدوا ان هما يتخانقوا مع بعض 

وسيف وتالا وعمر كانوا بيبصوا عليهم بخوف وهما كانوا حاطين ايدهم على بقهم وبيترعشوا 

في اللحظه دي ظهر راجل كبير لابس ابيض وشه ابيض عينيه خضراء كان قاعد على العصا السحريه وطاير في السما وكان بطلنا الاخير ( ثاروس) 

بص ثاروس على النمر والاسد وهما بيتخانقوا وطلع شرار من عينيه قضت على الاسد وخلت جوري ترجع لطبيعتها 

سيف وتالا وعمر اول ما شافوا فتحوا بقهم بصدمه مكنوش مصدقين 

اما جوري كانت بتتنطط من الفرحه انها رجعت لطبيعتها تاني 

جوري بفرحه: انا مش مصدقه انت انقذتني اوي يا عمو بجد 

وراحت جوري حضنت تالا 

وراحت وقفت قدام عمر وابتسمتله ابتسامه حلوه 

عمر قرب منها ومسك ايدها وبصلها بكل حب وقال

عمر بحب: حمد لله على سلامه يا جوري نورتي 

في اللحظه دي نزل ثاروس من على العصا و وقف قدامهم وقال 

ثاروس: معلش عشان هقطع اللحظه الرومانسيه دي لكن يا جوري انتي وتالا وسيف وعمر انا محتاج مساعدتكم في القضاء على ماليفيرا 

جوري: انتم بتعرفوا ازاي واحنا ازاي هنساعدك تتخلص من ماليفيرا واللؤلؤه معاها 

تالا: وبعدين احنا عايزين نمشي من هنا كفايه اللي شفناه احنا كنا جايين نخيم عادي انا اتقلبت بطه وجوري نمر وعمر غوريلا وسيف اتربط وجوري كانت هتاكلنا وحوت كان هيهجم علينا و تنين جري ورانا مشينا واتصرفوا انتم مع بعض 

عمر: احنا مش عايزين نخاطر بحياة حد فينا تاني 

سيف: اصلا ماليفيرا مخوفانا بالتنين بتاعها وبالصولجان بتاعها مش هنقدر نعمل حاجه معاها 

ثاروس: انا قولت اسيبكم تخلصوا كلامكم اول حاجه هعرفكم بنفسي انا ثاروس كنت ملك الجزيره وكنت مخلي الجزيره تمام جت ماليفيرا خدت الصولجان وخلت الصولجان بقوه شريره واللؤلؤه دي انا اللي رميت اللؤلؤه في اعماق البحر عشان لو اللؤلؤه بقت في ايديها هتسيطر على العالم والكل هيكون بيكره بعض ومش بعيد الناس تقتل بعض كمان عشان كده انا عايز اللؤلؤه قبل ما تحنقها بالشر 

في اللحظه دي ابطالنا الاربعه قعدوا يبصوا لبعض وهما كانوا مصدومين ومش عارفين يردوا يقولوا ايه 

كمل ثاروس كلامه وقال 

ثاروس: انا هساعدكم وهديكم اللي يقضي على ماليفيرا 

جوري: طيب بما ان معاك اللي يقضي على ماليفيرا ما تروح تقضي انت عليها 

ثاروس: هي حاطه على الكوخ بتاعها قوه تمنعني ادخل وهي للاسف بتحس لما اكون قريب من الكوخ بتأذي انا كنت بحاول اجي انقذكم منها لكن كانت بتسبقني وتخليكم تنفذوا كلامها استغليت فرصه انشاغلها وجتلكم ها قولتوا اي هتساعدوني 

ابطالنا الاربعه بصوت واحد: موافقين عشان نحمي العالم نكمل مهمتنا للاخر مش هنرضى نكون سبب في دمار العالم 

ثاروس بص عليهم بابتسامه جميله اوي 

بعد وقت كانت ماليفيرا قاعده في الكوخ بتاعها وقدامها اللؤلؤه 

ماليفيرا: خلاص اللؤلؤه بقت ملكي وهما زمانهم خلصوا على بعض وانا اللي هسيطر على العالم واعمل كل اللي انا عايزاه ها ها ها 

في اللحظه دي دخلوا ابطالنا الاربعه الكوخ 

ماليفيرا اول ما شافتهم انصدمت وقامت وقفت قدامهم 

ماليفيرا بصدمه: جوري انتي ازاي رجعتي وانتم ازاي عايشين هي ازاي مكلتكوش ده انا مخلياها متقدرش تسيطر على جوعها بس عادي هقضي عليهم 

ورفعت ماليفيرا الصولجان بتاعها و وجهته ناحيتهم وقبل ما تغمض 

مسكت جوري رشاش ورشته على ماليفيرا وكانت بتقول وهي بترش

جوري: خلاص الشر هينتهي من على ارض الجزيره مش هنسمحلك تدمري العالم بشرك الخير هينتصر واحنا اللي هنفوز انتي انتهيتي يا ماليفيرا 

ماليفيرا اول ما سمعت كده كأن رصاصه جت على قلبها حطت ايدها على قلبها و وقعت ماليفيرا على الارض واغمى عليها 

في اللحظه دي راحت جوري ومسكت الصولجان وكسرته 

وتالا راحت خدت اللؤلؤه 

سيف وعمر ربطوها بالحبل اللي خدوه من ثاروس 

في اللحظه دي دخل ثاروس الكوخ وطلع شرار من عينيه ناحية ماليفيرا 

واتحاطت ماليفيرا بين قبضان القفص 

ثاروس بص عليهم وابتسم وقال

ثاروس: جادعين مخفتوش وعملتوا المطلوب كده ماليفيرا انتهت 

جوري: بقولك اي هو ازاي انت عندك قوة العيون وهي الصولجان مش لايق عليك خالص 

ثاروس: الصولجان ده كان بتاعي هي خدته مني انا كنت بستخدمه في الخير وهي بقت تستخدمه في الشر وانا بعد ما خدت الصولجان بقى عندي قوة العيون المهم انا هرجع الجزيره زي ما كانت وماليفرا كده خلاص هتفضل محبوسه في القفص لحد موت واللؤلؤه دي هترجع في اعماق البحر وهرميها قدامكم وانتم كفايه عليكم كده ارجعوا مطرح ما جيتوا 

هزوا ابطالنا راسهم بالموافقه 

ومشي ثاروس وهما مشيوا  وراه ورمى ثاروس اللؤلؤه قدامهم 

وطلع ثاروس شراره من عينيه رجعت الجزيره زي الاول 

وقرروا ابطالنا الاربعه انهم يطلعوا من الجزيره زي ما دخلوها 

بعد لحظات 

كانوا ابطالنا خارج الجزيره وكانوا بيتنططوا من الفرحه انهم قدروا يتجاوزوا كل ده لوحدهم 

عمر قرب من جوري وحضنها وبصلها بكل حب وقال 

عمر بحب: احلى حاجه حصلت في ده كله اني اتعرفت عليكي وحبيتك بحبك يا جوري بحبك اوي بس عارفه لسه في مشكله اي

جوري باستغراب: مشكلة اي تاني خير انا مش ناقصه قلق 

عمر بضحك: اني نفسي اكل موز اوي

ركع عمر قدام جوري وقال 

عمر: تتجوزيني يا جوري 

هزت جوري راسها بالموافقه 

وسيف وتالا كانوا بيسقفوا 

في اللحظه تالا ضربت سيف  على قفاه 

سيف: واه ليه بقى الغدر ده انا عملت اي مش عارف 

تالا: ماهي المشكله انك معملتش قولي انك بتحبني فالح تقف معايا وخلاص 

سيف: ان صبر القاتل على المقتول كان مات لوحده بحبك يا مجنونه قلبي

تالا بحرج مصطنع: بحبك اكتر متكسفنيش بقى 

في اللحظه دي اتكلمت جوري بصوت عالي وقالت

جوري: يا جماعه انا جعانه اوي مش قادره هموت من الجوع 

اول ما سيف وتالا وعمر سمعوا كده جريوا من قدام جوري 

اما جوري ضحكت جامد وقالت 

جوري بضحك: هههههه مجانين ده كان نفسي في دونتس 

وانتهى اليوم بعد ما اتفقوا ان عمر وسيف هيتقدموا لي تالا وجوري وكل واحد فيهم راح على بيته وحكى لاهله المغامره دي وعبد الرحمن لما سمع كده اتعصب عشان هما كذبوا عليه في البدايه لكن بعد كده فرح انهم كانوا رجاله واثبتوا نفسهم و وافق على انه يقابل عمر وسيف 

وبعد اسبوع 

كان عمر وسيف وعيلتهم راحوا اتقدموا لي تالا وجوري وحددوا كل حاجه واتفقوا على ان الفرح يكون بعد 8 شهور 

بعد 8 شهور في فرح ابطالنا اللي كان في قاعه كبيره جدا وكانوا ابطالنا بيرقصوا سلو 

عند عمر وجوري 

تالا: تعرف انا عرفت انك مناسب ليا لما اتحملتني لما كنت نمر قولت يبقى هو ده اللي هيتحملني في معظم حالاتي 

عمر: حتى لو كنتي اتحولتي قرد هحبك بردو 

ابتسمت تالا بعد ما سمعت الكلام ده 

عند سيف وتالا 

سيف: ده احنا بس لما نروح بقى انا تضربيني بالقفا ماشي يا بطه 

تالا بمشاكسه: فدايا يا قرة عيني اي حاجه مش كده ولا اي

هز سيف راسه بالموافقه 

وضحكوا سيف وتالا مع بعض 

واتصوروا كلهم صوره عائليه جميله 

و انتهت قصتنا مع نهاية شر ماليفيرا وانتصار الخير ثاروس

مصايب وجنان التؤام فى الغابة السحرية _ حكايات شروق للقصص الكاملة

Related Posts